Dalvík/Reynir mætti Fjölni í 2. deild kvenna

Dalvík/Reynir var í heimsókn í Grafarvoginum á Extravellinum hjá Fjölni í dag í 11. umferð Íslandsmótsins. Liðin mættust í deildinni í fyrra og vann Fjölnir leikinn 2-0.

Fjölnir er efsta liðið í deildinni og hafði aðeins tapað einum leik fyrir þennan. D/R var í 7. sætinu fyrir leikinn. D/R var búið að vinna 3 leiki í röð í deildinni fyrir þennan leik og voru ágætlega vel stemmdar gegn toppliðinu.

Fjölnir byrjaði leikinn vel og kom fyrsta markið 24. mínútu og var staðan 1-0 fyrir heimaliðið. Fjórum mínútum síðar var staðan orðin 2-0. Á 30. mínútu fékk markmaður Fjölnis rautt spjald, enginn varamarkmaður var á leikskýrslu og skaust því varnarmaðurinn Freyja Ólafsdóttir í markið.  Það veikti síst liðið og gerðu þær tvö mörk til viðbótar fyrir hálfleik og var staðan 4-0.

Þjálfari D/R gerði tvær skiptingar í hálfleik. Á 60. mínútu skoraði D/R gott mark og var það Erika Rakel Melsen Egilsdóttir, sem minnkaði muninn í 4-1.

Fjölnisstelpur voru ekki hættar, þær gerðu fljótlega tvö mörk nánast í röð og var staðan orðin 6-1 á 69. mínútu. Lokamarkið kom rétt fyrir leikslok og lauk leiknum með 7-1 sigri Fjölnis.

Dalvík/Reynir eru í 7. sæti eftir þennan leik.