Dalvíkurbyggð styrkir Björgunarsveitina Dalvík

Dalvíkurbyggð hefur ákveðið að styrkja Björgunarsveitina Dalvík um 3 milljónir króna núna í desember, vegna dýrmæts og óeigingjarns framlags þeirra til samfélagsins á ögurstundum.

Tilkynning frá Sveitarstjórn Dalvíkurbyggðar:

Í veðurhamförum liðinnar viku gegndi Björgunarsveitin Dalvík lykilhlutverki í viðbragðsaðgerðum. Liðsmenn sveitarinnar stóðu vaktina dag og nótt, leiddu aðgerðir í dölunum og lögðu sig í margvíslega hættu í hjálparstörfum sínum. Þarna eru okkar sérfræðingar sem hafa kunnáttu til að takast á við erfiðar aðstæður og eru vel tækjum búnir. Sálgæsluhlutverk björgunarsveitarmanna er einnig mjög mikilvægur og þakkarverður þáttur í þeirra störfum. Í svona aðstæðum er Björgunarsveitin okkar lykilaðili.