Efnilegur Dalvíkingur til Vålerenga á reynslu

Sóknarmaðurinn Nökkvi Þeyr Þórisson í Dalvík/Reyni  fer í byrjun október á reynslu til Vålerenga í Noregi.  Nökkvi mun skoða aðstæður hjá Norska klúbbinum og æfa með aðalliði Vålerenga í vikutíma.  Vålerenga er sem stendur í 7. sæti efstudeildar í Noregi. Hjá félaginu er einn Íslendingur en það er hann Samúel Kári Friðjónsson. Þetta kemur fram á dalviksport.is.
Þjálfari liðsins er Ronny Deila en hann hefur m.a. verið hjá stórliði Celtic í Skotlandi.

Pepsi-deildar félög hér á landi hafa einnig fylgst náið með bræðrunum Þorra og Nökkva og fóru þeir m.a. í vikutíma á reynslu til FH núna í sumar.

Þeir bræður spiluðu stórt hlutverk hjá Dalvík/Reyni í sumar eftir að hafa komið heim frá Hannover í Þýskalandi. Þorri Mar spilaði alla 18 leiki liðsins og gerði í þeim 4 mörk. Nökkvi lék 16 leiki og endaði sem markahæsti leikmaður liðsins með 10 mörk.

Það verður því spennandi að fylgjast með framtíð leikmannana en ljóst er að þetta er mikil viðurkenning fyrir það starf sem unnið er í kringum fótboltann í Dalvíkurbyggð.

Heimild og mynd: dalviksport.is