Fjarðarhlaupið í Fjallabyggð á laugardaginn

Fjarðarhlaupið í Fjallabyggð fer fram laugardaginn 16. ágúst næstkomandi á vegum Skíðafélags Ólafsfjarðar. Þetta er í fimmta skiptið sem hlaupið er haldið. Ýmsar leiðir og útfærslur eru í boði og ættu allir að finna sér hlaup eða göngu við hæfi. Skráning á Netskraning.is

Lengsta hlaupið er 32 km fjallahlaup frá Siglufirði til Ólafsfjarðar.  Ræst verður frá Sigló Hótel og hlaupið sem leið liggur inn Hólsdal í Siglufirði og upp í Hólsskarð. Þar er stefnan tekin niður Ámárdal, niður í Héðinsfjörð að Héðinsfjarðargöngum. Þá er stefnan sett á Víkurdal yfir Rauðskörð og niður Ytri-Árdal að Kleifum í Ólafsfirði. Endamark er í miðbæ Ólafsfjarðar. Hlaupið er fyrir 17 ára og eldri.

Næst er 18 km fjallahlaup fyrir 12 ára og eldri, en mælt með að börn séu í fylgd með fullorðnum. Ræst er frá Héðinsfjarðargöngum og hlaupið sem leið liggur að Víkurdal, hlaupið inn dalinn og yfir Rauðskörð (600m) og niður Ytri-Árdal að Kleifum í Ólafsfirði. Endamark er í miðbæ Ólafsfjarðar.

Nýtt hlaup í boði sem er 12 km utanvegarhlaup. Ræst er frá Kleifum í Ólafsfirði og hlaupið sem leið liggur inn Syðri Árdal. Hlaupið er inn fyirr “hóla” í Syðri Árdal, þar farið yfir ánna og hlaupið niður aftur að Kleifum. Endamark er í miðbæ Ólafsfjarðar.

Skemmtiskokk er í boði 5 km og 10 km. Ræst er í miðbæ Ólafsfjarðar og hlaupinn 5 eða 10 km hringur á götum og stígum. Hlaup sem hentar öllum.

Gönguferð er nýr viðburður einnig.  Gönguferð Héðinsfjörður – Rauðskörð – Kleifar Ólafsfirði
Gönguferð undir leiðsögn Maríu Bjarney Leifsdóttur, tilvalin valkostur fyrir göngufólk eða þá sem treysta sér ekki til að hlaupa meiri hluta leiðarinnar.