Hús rýmd á Siglufirði eftir að snjóflóð féll á skíðasvæðið

Veðurstofa Íslands hefur ákveðið að hækka viðbúnaðarstig vegna snjóflóðahættu á Norðurlandi í hættustig. Ákveðið hefur verið að rýma reit syðst á Siglufirði og mun lögregla hafa samband við þá sem þurfa að rýma.
Í morgun kom í ljós að snjóflóð hafði fallið á skíðasvæðið í Skarðsdal á Siglufirði og valdið talsverðu tjóni. Svæðið mannlaust á þeim tíma en talið er að flóðið hafi orðið um kl. 8:24 þegar rafmagn fór af vefmyndavél skíðasvæðisins. Siglufjarðarvegur og Ólafsfjarðarmúli eru enn lokaðir vegna snjóflóðahættu.
Aðgerðarstjórn hefur verið virkjuð á Akureyri og komið á stöðugum samskiptum við alla hlutaðeigandi aðila til að tryggja upplýsingaflæði. Almannavarnadeild óskaði eftir því við Landhelgisgæsluna að varðskip yrði á svæðinu, til aðstoðar ef á þyrfti að halda, og mun varðskipið Týr vera á leiðinni norður.
Áfram verður haldið að fylgjast náið með aðstæðum á Tröllaskaga og viðeigandi ráðstafanir gerðar ef á þarf að halda. Íbúar og aðrir sem eru á þessu svæði eru beðnir um að fylgjast vel með veðurspá: Búast má við talsverði ofankomu á Tröllaskaga fram yfir komandi helgi.
Nokkuð stíf norðlæg átt með snjókomu hefur verið síðan í gærmorgun og talsverð úrkoma mæld á annesjum Norðanlands. Í gær féll snjóflóð yfir Ólafsfjarðarveg og lokaði honum en í dag sáust talsvert stór snjóflóð úr Ósbrekkufjalli í Ólafsfirði og féll eitt þeirra fram í sjó. Búist er við stífri norðan- og norðaustan átt með snjókomu og éljum fram yfir helgi.

Lögreglustjórinn á Norðurlandi eystra og almannavarnadeild ríkislögreglustjóra fylgjast áfram vel með framvindu og horfum á svæðinu í nánu samstarfi við Veðurstofu Íslands.