Húsasmiðjan lokar á Dalvík

Um næstu áramót verður verslunum Húsasmiðjunnar á Dalvík og Húsavík lokað. Rekstur þeirra verður í framhaldinu sameinaður í einni glæsilegustu byggingavöruverslun landsins og þjónustumiðstöð Húsasmiðjunnar fyrir Norðurland.  Verslunin verður opnuð við Freyjunes á Akureyri á fyrri hluta næsta árs. Öllum fastráðnum starfsmönnum á Húsavík og Dalvík verður boðið að starfa áfram í nýju versluninni. 

Forsvarsmenn og eigendur Húsasmiðjunnar eru meðvitaðir um mikilvægi þess fyrir smærri og dreifðari byggðir landsins að hafa aðgang að góðri þjónustu í heimabyggð, enda hefur það verið stefna fyrirtækisins um árabil að þjóna smærri byggðum og sýna samfélagslega ábyrgð í verki.

Rekstrargrundvöllur Húsasmiðjunnar á Dalvík og Húsavík hefur hins vegar reynst þungur undanfarin ár þrátt fyrir veljvilja bæði heimamanna og fyrirtækisins. Hörð samkeppni, aukin vefverslun og fleiri breytingar á markaði hafa gert það að verkum að rekstur byggingarvöruverslana og timbursölu á sér ekki grundvöll á þessum stöðum. 

Árni Stefánsson, forstjóri Húsasmiðjunnar:

,,Við hjá Húsasmiðjunni höfum átt mjög gott samband við viðskiptavini okkar á Húsavík og Dalvík um árabil og er þessi ákvörðun, okkur þungbær.  Við munum þrátt fyrir þessa breytingu kappkosta að þjónusta viðskiptavini á Norðurlandi vel, þar á meðal á Dalvík og Húsavík. Jafnframt mun söluskrifstofa verða opnuð á Húsavík í upphafi næsta árs með ráðgjöf fyrir bæði einstaklinga og fyrirtæki.” 

Húsasmiðjan hefur aukið úrval og þjónustu í vefverslun Húsasmiðjunnar og vöxtur hennar margfaldast á stuttum tíma. Fyrir liggur að styrkja vefverslun félagsins enn frekar með auknu vöruúrvali og þjónustu á næstu misserum sem nýtist öllum landsmönnum.

Að lokum þakkar Húsasmiðjan bæði Dalvíkingum og Húsvíkingum fyrir velvild og viðskipti í gegnum árin.  Jafnframt bjóðum við viðskiptavini okkar þar sérstaklega velkomna í nýju verslunina við Freyjunes á Akureyri, þegar hún tekur til starfa með auknu vöruúrvali og enn betri þjónustu.

Texti: Aðsend fréttatilkynning.