Ráðinn framkvæmdastjóri Menningarfélagsins Bergs

Dagur Óskarsson hefur verið ráðinn framkvæmdastjóri Menningarfélagsins Bergs.  Alls bárust fimm umsóknir um starfið og ákvað stjórn Menningarfélagsins að ganga til samninga við Dag.  Dagur mun hefja störf 1. mars næstkomandi.

Dagur lauk stúdentsprófi af raungreinadeild Verkmenntaskólans á Akureyri árið 1998. Hann stundaði nám við Myndlistaskólann á Akureyri árið 2003 – 2005 í fornáms- og  fagurlistadeild. Hann lauk BA prófi frá Listaháskóla Íslands úr Hönnunar og arkitektúradeild í vöruhönnun 2008 og diploma við Listaháskóla Íslands við listkennsludeild árið 2010.  Síðan þá hefur Dagur starfað hjá Sæplast Iceland ehf. við vöruhönnun og verkefnisstjóri þróunar og vöruhönnunarverkefna.

Meðfram námi starfaði Dagur m.a. sem kennari og vöruhönnuður og vann m.a. við uppsetningu sýninga og aðstoð við listamenn við uppsetningar sýninga og frágang verka. Þá hefur hann átt verk á mörgum sýningum. Dagur stundar nú APME nám í verkefnastjórnun við Háskólann í Reykjavík.

 

Heimild: dalvik.is