Rýming stendur enn yfir í Útkinn

Rýming stendur enn yfir í Útkinn og óvissustig í gildi fyrir Tröllaskaga.
Bærinn Nípá í Útkinn hefur verið rýmdur auk þeirra fimm bæja sem rýmdir voru í nótt. Óvenju mikil úrkoma hefur verið á svæðinu og mikið vatn er enn í fjallshlíðum. Fjölmargar aurskriður hafa fallið á stóru svæði og er hættustig enn í gildi á svæðinu.
Þyrla landhelgisgæslunnar tók myndir af fjallshlíðum í dag og hefur ferjað íbúa á þeim bæjum sem voru innlyksa. Bændur hafa notið aðstoðar björgunarsveita til að komast til mjalta í dag. Að loknum stöðufundi með Veðurstofu Íslands var ákveðið að rýming standi enn yfir en næsti stöðufundur verður haldinn um hádegi á morgun.
Meðfylgjandi eru myndir af hlíðinni fyrir ofan Björg og skriðuföllum í Útkinn.
Lögreglan á Norðurlandi eystra greindi frá þessu og birti myndir á samfélagsmiðlum.