Um 30 manns í dvöldu í Grímsey yfir hátíðirnar

Heldur rólegt en afar góðmennt var í Grímsey um hátíðarnar. Um 30 manns dvöldu í eyjunni og var haldið jólaball í félagsheimilinu Múla á milli jóla og nýárs auk þess sem árleg brenna var haldin á gamalárskvöld. Vont veður kom í veg fyrir að hægt væri að halda hátíðarmessu í Grímsey á milli jóla og nýárs en til stóð að hún færi fram í félagsheimilinu. Þess í stað var messað 6. janúar síðastliðinn.

Það verður stöðugt algengara að ferðamenn heimsæki Grímsey í svartasta skammdeginu þótt enginn hafi dvalið þar yfir sjálfar hátíðarnar að þessu sinni. Dálítið var um ferðamenn í desember og von er á fleirum nú strax í byrjun árs, sækjast þeir festir eftir að komast yfir heimskautsbauginn og skoða kennileitið Orbis et Globus eða Hringur og kúla.

Þrjú gistiheimili eru opin í Grímsey allt árið auk verslunar og afþreyingar. Flogið er þrisvar sinnum í viku frá Akureyri á þessum árstíma og siglt frá Dalvík þrjá daga vikunnar og um miðjan mánuðinn bætist við fjórði dagurinn.